
No ano 2008 cando OQO publicara o libro ” Quen levou a lúa?” xa chamaran a nosa atención as ilustracións de Madalena Matoso á que ata ese momento non coñeciamos, a pesares de ser unha das mais importantes ilustradoras portuguesas. O ano seguinte conseguíu no seu país o 13º Premio Nacional de Ilustraçao polo seu libro “A charada bicharada”e nos ùltimos meses colaborou con OQO neste que agora recomendamos e tamén con Kalandraka facendo as ilustracións de “Ovelliña dame lá”.
En Portugal forma parte xunto con Isabel Minhós, coautora do libro, do equipo da magnífica editorial Planeta Tangerina, que na sùa páxina describe deste xeito o seu labor editorial: “Cada edição do Planeta Tangerina é preparada com os cuidados de uma fornada antiga de pão: recolhemos o cereal, apenas quando se encontra maduro; trituramos no moinho, em pedra que moa fininho para não passarem impurezas; e depois amassamos e voltamos a amassar, de mangas bem arregaçadas (e mãos sempre lavadas). Após um longo e quente repouso, tendemos pequenas bolas que vão a cozer em forno de lenha. Mais tarde, desfolhamos devagar cada exemplar, saboreando todo o miolo ainda fumegante…” Así que diante dalgúns dos seus libros unha pode exclamar Mmm…! , e con iso dicilo todo.
E a mesma expresión serve perfectamente para o que agora temos entre as mans e que nos leva de viaxe polo país dos Inuit da man dun pequeno esquimó. É un mundo dun branco infinito, pero sempre diferente : o branco das folerpas, o branco azul da auga, o branco da noite. Os ollos do neno transforman a aparente monotonía dunha paisaxe inmensa , sen árbores, sen montañas, sen vexetación, nunha explosión de luz e cor. O mesmo fai a ilustradora que, usando tan só anaquiños de papel, crea para nós unha colorista representación da vida cotiá do neno protagonista.
No blog de planeta tangerina pódense ver algunhas das fotos nas que se inspiraron as autoras cando estaban a traballar no libro e que son en verdade, como elas mesmas din, fascinantes: aqui.
Escrito por: Isabel Minhós Martíns
Ilustrado por: Madalena Matoso
Editorial: OQO
![Olga-cast_1_1[1] Olga-cast_1_1[1]](http://www.librariaquimbamba.com/wp-content/Olga-cast_1_11.png)





Recent Comments